बर्दघाट ।
पश्चिम नवलपरासीको बर्दघाट नगरपालिका–१२, सपहियामा गाउँस्तरीय पुरुष भलिबल प्रतियोगिता आजदेखि सुरु भएको छ। प्रतियोगिताको उद्घाटन पश्चिम नवलपरासी निर्वाचन क्षेत्र नं. १ का संघीय सांसद विक्रम खनालले गरेका हुन्।
उद्घाटन समारोहलाई सम्बोधन गर्दै प्रमुख अतिथि सांसद खनालले खेलकुद युवाहरूको शारीरिक तथा मानसिक विकाससँगै राष्ट्रको पहिचान स्थापित गर्ने महत्वपूर्ण माध्यम भएको बताए। युवाहरूलाई खेलकुदमा सक्रिय बनाउन सके उनीहरूको प्रतिभा प्रस्फुटन हुनुका साथै अनुशासन, एकता, सहकार्य र नेतृत्व विकासमा समेत सहयोग पुग्ने उनको भनाइ थियो।
उनले युवाहरूलाई सकारात्मक र रचनात्मक गतिविधिमा जोड्न आवश्यक रहेको उल्लेख गर्दै खेलकुदले युवाहरूलाई लागुऔषध दुर्व्यसन तथा अन्य सामाजिक विकृतिबाट टाढा राख्न महत्वपूर्ण भूमिका खेल्ने बताए। स्थानीयस्तरमा आयोजना हुने यस्ता प्रतियोगिताले गाउँघरमा लुकेर रहेका खेल प्रतिभाको पहिचान र विकास गर्न सहयोग पुग्ने भन्दै उनले खेलकुद क्षेत्रको विकासका लागि सबै पक्षले हातेमालो गर्नुपर्नेमा जोड दिए। खेलकुदलाई मनोरञ्जनका रूपमा मात्र नभई सम्भावना र भविष्य निर्माणको महत्वपूर्ण क्षेत्रका रूपमा लिनुपर्ने उल्लेख गर्दै सांसद खनालले खेलाडीलाई प्रोत्साहन गर्ने वातावरण निर्माण गर्नुपर्ने बताए।
त्यस्तै, कार्यक्रमलाई सम्बोधन गर्दै पूर्व राष्ट्रिय भलिबल खेलाडी गिरीशकुमार चौधरीले शिक्षा, स्वास्थ्य र खेलकुदलाई प्राथमिकतामा राख्नुपर्ने धारणा व्यक्त गरे।
जागृति युवा क्लब, बर्दघाट नगरपालिका–१२, सपहियाको आयोजनामा सञ्चालन भइरहेको प्रतियोगितामा २० समूहको सहभागिता रहेको छ।
प्रतियोगितामा प्रथम हुने समूहले नगद २५ हजार ५ सय ५५ रुपैयाँ र द्वितीय हुने समूहले १५ हजार ५ सय ५५ रुपैयाँ पुरस्कार प्राप्त गर्ने आयोजकले जनाएको छ।
क्लबका अध्यक्ष देवेन्द्र चौधरीको अध्यक्षतामा सम्पन्न उद्घाटन कार्यक्रममा वडा सदस्य विकास क्षेत्रीले स्वागत मन्तव्य राखेका थिए। कार्यक्रमको सञ्चालन सबिन पाठकले गरेका थिए।
-1791430971.jpeg)
-1791466840.jpeg)
