बनशक्ति सामूदायिक बनको १८औं साधारणसभा सम्पन्न

पर्यावरण

Home
पर्यावरण
बनशक्ति सामूदायिक बनको १८औं साधारणसभा सम्पन्न

बनशक्ति सामूदायिक बनको १८औं साधारणसभा सम्पन्न

बर्दघाट नगरपालिका वडा नं. १०, अलहवाल बिर्ता पश्चिम नवलपरासीमा रहेको वनशक्ती सामुदायिक वन उपभोक्ता समूहको १८औँ बार्षिक साधारसभामा सम्पन्न भएको छ। कार्यक्रमलाई सम्बोधन गर्दै डिभिजन वन कार्यालयका प्रमुख न्यौपानेले वन व्यवस्थापन वैज्ञानिक, दिगो र समुदायमैत्री हुनुपर्नेमा जोड दिए। उनले वन संरक्षणसँगै स्थानीय समुदायको आयआर्जन र रोजगारीसँग जोडिने कार्यक्रमलाई प्राथमिकता दिनुपर्ने बताए। उनले वनलाई केवल काठको स्रोतका रूपमा मात्र नहेरी जैविक विविधता, पर्यटन, जडीबुटी तथा वातावरणीय सेवाको महत्वपूर्ण स्रोतका रूपमा विकास गर्नुपर्ने धारणा राखे। सामुदायिक वनले प्रचलित नीति, नियम र विधिको पालना गर्दै आफ्नो कार्यसम्पादन गर्नुपर्नेमा पनि उनले जोड दिए।
त्यस्तै, कार्यक्रमलाई सम्बोधन गर्दै जिल्ला समन्वय समितिका सदस्य धनिराम चौधरीले विकास निर्माणका क्रममा वातावरण र प्रकृति संरक्षणलाई पनि प्राथमिकतामा राख्नुपर्ने बताए। उनले सडक, भवनलगायतका पूर्वाधार विकास आवश्यक भए पनि निर्माणका क्रममा वन तथा वातावरणमा पर्ने असरलाई ध्यान दिनुपर्नेमा जोड दिए। उनले वर्तमान पुस्ताले प्रकृतिको दोहन मात्र नगरी भावी पुस्ताका लागि सुरक्षित र स्वच्छ वातावरण हस्तान्तरण गर्ने जिम्मेवारीसमेत निर्वाह गर्नुपर्ने धारणा व्यक्त गरे।
त्यस्तै, कार्यक्रमलाई सम्बोधन गर्दै बर्दघाट नगरपालिका–१० का वडा अध्यक्ष राजु मिश्रले वनलाई केवल रूखहरूको समूहका रूपमा नभई मानव जीवनको आधारका रूपमा बुझ्नुपर्ने बताए। उनले वनले वातावरणीय सन्तुलन कायम गर्नुका साथै पानीका स्रोत तथा जैविक विविधताको संरक्षण र जलवायु परिवर्तनका असर न्यूनीकरणमा महत्वपूर्ण भूमिका खेल्ने उल्लेख गरे। वन संरक्षण सरकारको मात्र जिम्मेवारी नभई स्थानीय समुदायको समेत उत्तिकै महत्वपूर्ण दायित्व भएको बताउँदै उनले सामुदायिक वनले वन संरक्षणसँगै त्यसबाट प्राप्त लाभलाई समुदायको विकासमा उपयोग गर्दै आएको धारणा राखे। उनले वन संरक्षणका लागि आफूहरूले विभिन्न प्रयास गर्दै आएको उल्लेख गर्दै वन अतिक्रमण रोक्न सबै पक्ष एकजुट भएर लाग्नुपर्नेमा जोड दिए।
कार्यक्रममा सामुदायिक वन उपभोक्ता महासंघ पश्चिम नवलपरासीकी अध्यक्ष शारदा पोखरेलले वनको संरक्षणले प्रर्यावरणमा ठुलो भूमिका खेल्ने विचार व्यक्त गरिन् । अध्यक्ष पोखरेलले “सामुदायिक वनको सबैभन्दा ठूलो उपलब्धि भनेको स्थानीय समुदायलाई वनको मालिकाना भावना विकास गराउनु हो। वन संरक्षण गर्दा त्यसको प्रत्यक्ष लाभ पनि समुदायले पाउनुपर्छ। तर वनबाट लाभ लिने नाममा वनको विनाश हुनुहुँदैन। संरक्षण र उपयोगबीच सन्तुलन कायम गर्न सके मात्र सामुदायिक वनको उद्देश्य सार्थक हुन्छ” भनिन् ।
कार्यक्रममा संस्थापक अध्यक्ष छवि प्रसाद पौडेलले वन वातावरण जोगाउन समुदाय एक जुट हुनु पर्ने विचार व्यक्त गरे।
कार्यक्रममा चिसापानी सामुदायिक वन उपभोक्ता समूहका अध्यक्ष होम बहादुर गुरुङले समाज हरेक कार्यक्रममा सबै सँगै भएपनि वन जोगाउने, वन अतिक्रमण रोक्ने सवालमा भने एक ले अर्को लाई देखाएर उम्किने परिपाटीको विकास भएको छ। उनले नेपालमा अहिले नखाएको विष लागेको बताए। उनले सामुदायिकबनका आन्तरिक खपत हुने काठको १० प्रतिशत कर अवैज्ञानिक भएको बताए।
कार्यक्रममा पञ्चनगर खानेपानी तथा सरसफाइ उपभोक्ता संस्थाका अध्यक्ष कर्ण बहादुर खत्रीले वन जंगल जोगाउन खानेपानी र वन सँगै मिलेर अघिबड्नु पर्ने विचार गर्दै उनले वन वातावरण जोगाउन सके मात्र खाने पानीको मुहान सुरक्षित राख्न सकिने बताए।
कार्यक्रम संस्थाका अध्यक्ष इन्द्र चौधरीले हाल वनमा चोरी निकासी शून्य भएको, अति बिपन्न परिवारका लागि २२ क्युफिट काठ निःशुल्क वितरण गरिएको, १५० कुन्टल दाउरा निःशुल्क वितरण गरिएको, बोट बिरुवा राम्रो सँग हुर्काउन वन सफा गरिएको बताए। चौधरीले आगामी वर्षका लागि ६६ लाख ३१ हजारको नीति तथा कार्यक्रम प्रस्तुत गरेका थिए।
कार्यक्रममा कोषाध्यक्षको प्रतिवेदन समूहकी कोषाध्यक्ष सृजना थापाले, आन्तरिक लेखा समितिको प्रतिवेदन रामनरेश चौधरीले उपभोक्ता समक्ष प्रस्तुत गरेका थिए ।
समूहका सचिव कविता कुमारी फौजदारको सञ्चालनमा सञ्चालित कार्यक्रममा स्वागत मन्तव्य समूहका उपाध्यक्ष फणीन्द्र चौधरीको रहेको थियो।
समूहमा हाल २३८० परिवार सदस्य रहेका छन्। २०५४ सालमा स्थापना भएको वन ४०४.३३ हेक्टर रहेको छ।