वन कार्यालयका प्रमुख १२ हजार घुससहित नियन्त्रणमा

राजनीति

Home
राजनीति
वन कार्यालयका प्रमुख १२ हजार घुससहित नियन्त्रणमा

वन कार्यालयका प्रमुख १२ हजार घुससहित नियन्त्रणमा स्रोत नखुलेको रु. १.३३ लाखसहित कुल रु. १.४५ लाख बरामद, अख्तियारद्वारा थप अनुसन्धान जारी

Mero pana बुधबार, असार २४, २०८३

सिरहा, असार २४ ।

अख्तियार दुरुपयोग अनुसन्धान आयोगले जिल्ला सिरहाको सव-डिभिजन वन कार्यालय बन्दीपुरका कार्यालय प्रमुख (अधिकृत आठौँ) राम केवल राय यादवलाई घुस रकमसहित नियन्त्रणमा लिएको छ।

अख्तियारका अनुसार उद्योगका लागि ल्याइएको काठ सिलबन्दीअनुसार भए/नभएको रुजु गरी आवश्यक कागजातसहितको फाइल फिर्ता गर्ने क्रममा सेवाग्राहीलाई दुःख–हैरानी दिँदै घुस मागिएको भन्ने सूचना तथा उजुरीका आधारमा आयोगको बर्दिवास कार्यालयबाट खटिएको टोलीले अनुसन्धान गरेको थियो।

अनुसन्धानका क्रममा कार्यालय प्रमुख यादवलाई सेवाग्राहीबाट रु. १२ हजार घुस/रिसवत लिइसकेको अवस्थामा नियन्त्रणमा लिइएको आयोगले जनाएको छ।

उनको साथबाट घुस रकम रु. १२ हजार, स्रोत नखुलेको रु. १ लाख ३३ हजार १ सय २० तथा एक थान मोबाइल समेत बरामद भएको छ। बरामद नगदको कुल रकम रु. १ लाख ४५ हजार १ सय २० रहेको आयोगले जनाएको छ।

आयोगको टोलीले यादवलाई सिरहाको कर्जन्हा नगरपालिका–४ स्थित मिर्चौयाबाट बन्दीपुर जाने महेन्द्र राजमार्गबाट नियन्त्रणमा लिएको हो। यस घटनाबारे थप अनुसन्धान भइरहेको अख्तियार दुरुपयोग अनुसन्धान आयोगले जनाएको छ।