मिटरब्याज पीडितको न्यायका लागि जनकपुर–काठमाडौं पैदल मार्च घोषणा

राजनीति

Home
राजनीति
मिटरब्याज पीडितको न्यायका लागि जनकपुर–काठमाडौं पैदल मार्च घोषणा

मिटरब्याज पीडितको न्यायका लागि जनकपुर–काठमाडौं पैदल मार्च घोषणा

काठमाडौं, असार ७ — मिटरब्याज विरुद्ध किसान–मजदुर आन्दोलन, नेपालले मिटरब्याज पीडितलाई न्याय दिलाउने उद्देश्यसहित जनकपुरदेखि काठमाडौंसम्म पैदल न्याय मार्च गर्ने घोषणा गरेको छ।

शनिबार सम्पन्न केन्द्रीय सचिवालय बैठकले सरकारलाई मिटरब्याजसम्बन्धी समस्या समाधानका लागि थप १०० दिनको समय दिने निर्णय गरेको जनाएको छ। आन्दोलनका अध्यक्ष अवधेश कुशवाहा को अध्यक्षतामा बसेको बैठकमा संयुक्त जनअधिकार मोर्चा, भगिनी संगठनका प्रतिनिधि तथा सचिवालय सदस्यहरूको सहभागिता रहेको विज्ञप्तिमा उल्लेख छ।

आन्दोलनले सरकारले तोकिएको अवधिभित्र मिटरब्याज पीडितको पक्षमा ठोस कदम नचाले देशव्यापी आन्दोलनका कार्यक्रम सञ्चालन गर्ने चेतावनी दिएको छ। सोहीअनुसार पहिलो चरणमा जनकपुर–काठमाडौं (पैदल) न्याय मार्च आयोजना गरिने भएको हो।

विज्ञप्तिअनुसार २०८३ असार २५ गते जनकपुरको तिरहुतिया गाछीबाट सुरु हुने पैदल यात्रा काठमाडौंसम्म पुग्नेछ। आन्दोलनले शान्तिपूर्ण रूपमा न्यायको माग राख्दै सरकारको ध्यानाकर्षण गराउने उद्देश्य रहेको जनाएको छ। साथै, यसबाट पनि माग सम्बोधन नभए आगामी दिनमा थप सशक्त सडक संघर्षका कार्यक्रम सार्वजनिक गरिने चेतावनी दिइएको छ।

आन्दोलनका तर्फबाट जारी प्रेस विज्ञप्तिमा मिटरब्याज पीडितलाई न्याय दिलाउन सरकार गम्भीर बन्नुपर्ने र समस्या समाधानका लागि प्रभावकारी कदम चाल्नुपर्नेमा जोड दिइएको छ।

प्रकाशित मिति: आइतबार, असार ७, २०८३ १२:३१

प्रतिक्रिया दिनुहोस्