बर्दघाट । ज्येष्ठ नागरिकको सम्मान, सामाजिक सुरक्षा तथा अधिकार संरक्षण गर्ने उद्देश्यले पश्चिम नवलपरासीको बर्दघाट नगरपालिका–१४ मा रहेको ज्येष्ठ नागरिक मुस्कान केन्द्रले ज्येष्ठ नागरिकका लागि जलपान, सम्मान तथा सचेतनामूलक कार्यक्रम सञ्चालन गरेको छ।
केन्द्रका अध्यक्ष दुर्गाप्रसाद उपाध्यायको अध्यक्षता तथा बर्दघाट नगरपालिकाका नगरप्रमुख शम्भुलाल श्रेष्ठको प्रमुख आतिथ्यतामा कार्यक्रम सम्पन्न भएको हो। कार्यक्रममा ७० वर्ष उमेर पूरा गरेका ३५० भन्दा बढी ज्येष्ठ नागरिकलाई सम्मान गरिएको थियो भने ९० वर्ष उमेर पूरा गरेका ज्येष्ठ नागरिकलाई विशेष सम्मान प्रदान गरिएको आयोजकले जनाएको छ।
कार्यक्रमलाई सम्बोधन गर्दै नगरप्रमुख शम्भुलाल श्रेष्ठले ज्येष्ठ नागरिकको सम्मान, संरक्षण र सामाजिक सुरक्षाका लागि नगरपालिकाले आवश्यक कार्यक्रम सञ्चालन गर्दै आएको बताए। ज्येष्ठ नागरिक समाजका अनुभव, ज्ञान र संस्कारका स्रोत भएकाले उनीहरूको सम्मान र उचित हेरचाह गर्नु परिवार, समाज र राज्य सबैको दायित्व भएको उनले बताए।
उनले आजको कार्यक्रमले ज्येष्ठ नागरिकलाई परिवारभित्रै हुन सक्ने विभेद, अपहेलना तथा अन्यायका विषयमा जानकारी लिन र त्यस्ता समस्याविरुद्ध कानुनी उपचार खोज्न सहयोग पुग्ने विश्वास व्यक्त गरे। ज्येष्ठ नागरिकले आफ्नो अधिकारबारे जानकार रहनुपर्ने र परिवारका सदस्यले पनि उनीहरूप्रति सम्मानजनक व्यवहार गर्नुपर्नेमा उनले जोड दिए।
त्यस्तै, सरस्वती माध्यमिक विद्यालयका प्रधानाध्यापक शोमनाथ अधिकारीले ज्येष्ठ नागरिकका सवालमा बर्दघाट नगरपालिकाले उल्लेखनीय काम गरिरहेको बताए। तर ज्येष्ठ नागरिकको नियमित भेटघाट, अन्तरक्रिया, मनोरञ्जन, स्वास्थ्य तथा सामाजिक गतिविधि सञ्चालन गर्न आफ्नै भवनको आवश्यकता रहेको उनले औँल्याए।
उनले ज्येष्ठ नागरिक मुस्कान केन्द्रका लागि आवश्यक जग्गा पहिचान गरी संस्थाको स्वामित्वमा हस्तान्तरण गर्न नगरप्रमुखसँग आग्रह गरे। जग्गाको व्यवस्था भएमा समाजमा रहेका विभिन्न सामाजिक व्यक्तित्व तथा सहयोगी मनहरूबाट भवन निर्माणका लागि सहयोग जुटाउने वातावरण तयार गर्न सकिने उनको भनाइ थियो। ज्येष्ठ नागरिकका लागि भवन निर्माणको विषयलाई नगरपालिकाले प्राथमिकतामा राख्नुपर्ने उनले बताए।
कार्यक्रममा अधिवक्ता मित्रलाल लामिछानेले ज्येष्ठ नागरिकले परिवार तथा समाजबाट भोग्नुपर्ने सम्भावित विभेद, अपहेलना, सम्पत्तिसम्बन्धी जालसाजी तथा अधिकार हननका विषयमा प्रशिक्षण दिएका थिए। उनले परिवारका सदस्यबाटै हुन सक्ने आर्थिक, सामाजिक तथा मानसिक शोषणका स्वरूपबारे जानकारी गराउँदै त्यस्ता घटनाबाट बच्ने उपाय र कानुनी उपचारका बाटाबारे स्पष्ट पारेका थिए।
ज्येष्ठ नागरिकले आफ्नो सम्पत्ति, हकअधिकार र कानुनी संरक्षणका विषयमा जानकारी राख्नुपर्ने बताउँदै उनले अन्यायमा परेमा चुप लागेर बस्नुभन्दा सम्बन्धित निकायमा उजुरी गरी न्याय खोज्नुपर्नेमा जोड दिएका थिए। सचेतना कार्यक्रमले ज्येष्ठ नागरिकलाई आफ्ना अधिकारबारे जानकार बनाउन र आत्मसम्मानका साथ जीवनयापन गर्न प्रेरित गर्ने अपेक्षा गरिएको छ।
कार्यक्रममा विभिन्न भजन समूहले धार्मिक तथा सांस्कृतिक भजन प्रस्तुत गरेका थिए। भजन प्रस्तुतिले कार्यक्रमलाई थप मनोरञ्जनात्मक र आत्मीय बनाएको थियो। ज्येष्ठ नागरिकलाई जलपान गराउनुका साथै सम्मान प्रदान गरिएको कार्यक्रममा आपसी भेटघाट, अनुभव आदानप्रदान र आत्मीयताको वातावरणसमेत बनेको थियो।
कार्यक्रमका परिकल्पनाकार तथा संयोजक मधुसूदन अर्यालले संस्थाको उद्देश्य र कार्यक्रमको औचित्यमाथि प्रकाश पार्दै ज्येष्ठ नागरिकको सम्मान र संरक्षणलाई सामाजिक अभियानका रूपमा अघि बढाउनुपर्ने बताए। ज्येष्ठ नागरिकलाई एक्लोपनबाट मुक्त गराउँदै उनीहरूको अनुभव, ज्ञान र सीपलाई समाजसँग जोड्नु कार्यक्रमको मुख्य उद्देश्य रहेको उनले बताए।
संस्थाका अध्यक्ष दुर्गाप्रसाद उपाध्यायले ज्येष्ठ नागरिकको सम्मान केवल औपचारिक कार्यक्रममा सीमित नभई परिवार र समाजको दैनिक व्यवहारमा समेत प्रतिबिम्बित हुनुपर्ने बताए। ज्येष्ठ नागरिकले जीवनभर परिवार, समाज र राष्ट्रका लागि पुर्याएको योगदानको कदर गर्दै उनीहरूलाई सम्मानित, सुरक्षित र आत्मसम्मानपूर्ण जीवन बिताउने वातावरण निर्माण गर्न संस्था क्रियाशील रहेको उनले बताए।
कार्यक्रम संस्थाले तीन चरणमा सञ्चालन गर्ने योजनाअनुसार आयोजना गरिएको जानकारी दिँदै अध्यक्ष उपाध्यायले ७० वर्ष उमेर पूरा गरेका ३५० भन्दा बढी ज्येष्ठ नागरिकलाई सम्मान गरिएको र ९० वर्ष पूरा गरेका ज्येष्ठ नागरिकलाई विशेष सम्मान प्रदान गरिएको बताए।
कार्यक्रममा संस्थाका वरिष्ठ उपाध्यक्ष ईश्वरबहादुर जिसीले स्वागत मन्तव्य राखेका थिए। कार्यक्रमको सञ्चालन संस्थाका सचिव प्रेमप्रसाद पाण्डेले गरेका थिए।
जनप्रतिनिधि, स्थानीय संघसंस्थाका प्रतिनिधि, समाजसेवी, विभिन्न भजन समूह, संस्थाका कार्यसमिति सदस्य, शुभेच्छुक तथा ज्येष्ठ नागरिकसहित करिब ४०० जनाको सहभागिता रहेको कार्यक्रम सम्पन्न भएको संस्थाका सचिव प्रेमनारायण पाण्डेले जानकारी दिए।
ज्येष्ठ नागरिकको सम्मानसँगै उनीहरूको अधिकार, सुरक्षा र आत्मसम्मानका विषयमा सचेतना फैलाउने उद्देश्यले आयोजित कार्यक्रमले परिवार तथा समाजमा ज्येष्ठ नागरिकप्रतिको जिम्मेवारीबोध बढाउन महत्वपूर्ण योगदान पुर्याउने अपेक्षा गरिएको छ।
-1791430971.jpeg)
-1791466840.jpeg)
