भेटेरनरी अस्पतालका निमित्त प्रमुखसहित दुई जना घुस रकमसहित अख्तियारको नियन्त्रणमा

कृषि

Home
कृषि
भेटेरनरी अस्पतालका निमित्त प्रमुखसहित दुई जना घुस रकमसहित अख्तियारको नियन्त्रणमा

भेटेरनरी अस्पतालका निमित्त प्रमुखसहित दुई जना घुस रकमसहित अख्तियारको नियन्त्रणमा

सप्तरी ।

अख्तियार दुरुपयोग अनुसन्धान आयोगले भेटेरनरी अस्पताल तथा पशु सेवा विज्ञ केन्द्र, सप्तरीका निमित्त कार्यालय प्रमुख (पशु विकास अधिकृत/आठौँ) डा. राम पवित्र दास र हलुका सवारी चालक भोगेन्द्र यादवलाई घुस/रिसवत रकमसहित नियन्त्रणमा लिएको छ।

अख्तियारका अनुसार भ्याक्सिनेटरहरूले सेवा उपलब्ध गराएबापत पाउनुपर्ने भुक्तानी रकमको २० प्रतिशत कमिसन स्वरूप घुस मागिएको भन्ने सूचना तथा उजुरीका आधारमा आयोगको इटहरी कार्यालयबाट खटिएको टोलीले अनुसन्धान गरेको थियो।

अनुसन्धानका क्रममा सवारी चालक भोगेन्द्र यादवलाई सेवाग्राहीबाट घुसबापत लिइएको रु. ३३ हजार ३५० सहित नियन्त्रणमा लिइएको हो। साथै स्रोत नखुलेको रु. ४८ हजार ७० समेत बरामद भएपछि उनीबाट जम्मा रु. ८१ हजार ४२० बरामद गरिएको आयोगले जनाएको छ।

त्यसैगरी, भिन्न–भिन्न रकम उल्लेख भएका रु. १ लाख २९ हजार बराबरका चार थान चेक, एक थान मोबाइल तथा निमित्त कार्यालय प्रमुख डा. राम पवित्र दासको साथबाट एक थान मोबाइल र रु. १ लाख २५ हजार बराबरको एक थान चेक समेत बरामद गरिएको छ।

अख्तियारको टोलीले राजविराज नगरपालिका–३ स्थित भेटेरनरी अस्पताल तथा पशु सेवा विज्ञ केन्द्रको कार्यालय प्रमुखको कार्यकक्षबाट उनीहरूलाई नियन्त्रणमा लिई थप अनुसन्धान अघि बढाएको जनाएको छ।

प्रकाशित मिति: सोमबार, असार २२, २०८३ २२:३१

प्रतिक्रिया दिनुहोस्