होटल तथा रेष्टुरेन्टको अनुगमन कडाइ गर्न गृह मन्त्रालयको निर्देशन

स्वास्थ्य

Home
स्वास्थ्य
होटल तथा रेष्टुरेन्टको अनुगमन कडाइ गर्न गृह मन्त्रालयको निर्देशन

होटल तथा रेष्टुरेन्टको अनुगमन कडाइ गर्न गृह मन्त्रालयको निर्देशन

गृह मन्त्रालयले देशभरका होटल तथा रेष्टुरेन्टमा खाद्यान्नको गुणस्तर, सरसफाइ र नागरिक स्वास्थ्य सुरक्षालाई प्राथमिकतामा राख्दै नियमित तथा कडा बजार अनुगमन गर्न सबै जिल्ला प्रशासन कार्यालयलाई निर्देशन दिएको छ।

मन्त्रालयले जारी गरेको परिपत्रमा पछिल्लो समय होटल तथा रेष्टुरेन्टमा अस्वच्छ तथा गुणस्तरहीन खाना बिक्री भइरहेको भन्दै नागरिकबाट व्यापक गुनासा प्राप्त भएकाले अनुगमन प्रभावकारी बनाउन निर्देशन दिइएको उल्लेख छ।

निर्देशनअनुसार होटल तथा रेष्टुरेन्टमा नियमित, सघन तथा आकस्मिक अनुगमन सञ्चालन गरी नागरिकको स्वास्थ्यमा प्रतिकूल असर पार्ने वा प्रचलित कानुन उल्लङ्घन गर्ने व्यक्ति तथा संस्थामाथि कानुनबमोजिम कडा कारबाही गर्न भनिएको छ।

त्यसैगरी, प्रत्येक जिल्ला प्रशासन कार्यालयमा नागरिकका गुनासा सहज रूपमा दर्ता गर्न सकिने हटलाइन वा द्रुत सेवा डेस्क स्थापना गरी प्राप्त उजुरीलाई उच्च प्राथमिकताका साथ तत्काल सम्बोधन गर्न पनि मन्त्रालयले निर्देशन दिएको छ।

गृह मन्त्रालयले नागरिकको स्वास्थ्य सुरक्षा, उपभोक्ता अधिकारको संरक्षण तथा सुशासन कायम गर्ने उद्देश्यले सम्बन्धित निकायसँग समन्वय गरी उक्त निर्देशन कार्यान्वयन गर्न सबै प्रमुख जिल्ला अधिकारीलाई आग्रह गरेको छ।

प्रकाशित मिति: मंगलबार, असार १६, २०८३ २३:२१

प्रतिक्रिया दिनुहोस्