बर्दघाट — पश्चिम नवलपरासीको बर्दघाट नगरपालिका–४ स्थित कुमुदिनी स्कूलमा रक्तदान कार्यक्रम सम्पन्न भएको छ। विद्यालयमा गठित जुनियर रेडक्रस सर्कल कुमुदिनीको आयोजना तथा रक्त सञ्चार सेवा केन्द्रको प्राविधिक सहयोगमा कार्यक्रम सञ्चालन गरिएको हो।
जुनियर रेडक्रस सर्कल कुमुदिनीकी अध्यक्ष आसिका तिमिल्सिनाको अध्यक्षता तथा नेपाल रेडक्रस सोसाइटी नवलपरासी जिल्ला शाखाका उपाध्यक्ष एवं रक्त सञ्चार सेवा केन्द्रका संयोजक सुरज केसीको प्रमुख आतिथ्यतामा कार्यक्रम सम्पन्न भएको हो।
कार्यक्रममा प्रमुख अतिथि केसीले रक्तदान मानव जीवनसँग प्रत्यक्ष जोडिएको महान् मानवीय सेवा भएको बताए। उनले रगतको अभावका कारण कसैले पनि ज्यान गुमाउन नपरोस् भन्ने उद्देश्यले नियमित रक्तदानको संस्कार विकास गर्नुपर्नेमा जोड दिए। विद्यालय तहबाटै विद्यार्थीलाई मानवीय सेवा र सामाजिक उत्तरदायित्वप्रति प्रेरित गर्नु सकारात्मक कार्य भएको उनको भनाइ थियो।
विद्यालयकी अध्यक्ष कमला शर्माले शिक्षा केवल पाठ्यपुस्तकमा सीमित नभई विद्यार्थीमा सेवा, सहयोग र सामाजिक उत्तरदायित्वको भावना विकास गर्नु पनि विद्यालयको दायित्व भएको बताइन्। उनले जुनियर रेडक्रस सर्कलमार्फत विद्यार्थीहरू सामाजिक तथा मानवीय सेवाका कार्यमा सक्रिय हुँदै गएको भन्दै खुसी व्यक्त गरिन्।
विद्यालयका प्रधानाध्यापक रेश्मीराज बस्यालले रक्तदान कार्यक्रमले विद्यार्थी तथा समुदायमा रक्तदानको महत्त्वबारे सकारात्मक सन्देश प्रवाह गरेको बताए। आगामी दिनमा पनि विद्यालयले शिक्षा सँगसँगै सामाजिक सेवामूलक कार्यक्रमलाई निरन्तरता दिने उनको भनाइ थियो।
त्यस्तै, शिक्षक नायक दिपक बरालले कार्यक्रम सफल बनाउन सहयोग गर्ने रक्तदाता, स्वास्थ्यकर्मी, शिक्षक, विद्यार्थी तथा सम्पूर्ण सहयोगीप्रति धन्यवाद व्यक्त गरे। जुनियर रेडक्रसका विद्यार्थीको सक्रियतामा आयोजित कार्यक्रमले विद्यार्थीमा नेतृत्व क्षमता, सेवाभाव र सामाजिक जिम्मेवारीको विकास गर्न सहयोग पुग्ने उनले बताए।
कार्यक्रमकी अध्यक्ष आसिका तिमिल्सिनाले रक्तदान कार्यक्रम सफल बनाउन सहयोग गर्ने सबैप्रति आभार व्यक्त गर्दै जुनियर रेडक्रस सर्कलले आगामी दिनमा पनि मानवीय सेवा र सामाजिक सचेतनासम्बन्धी कार्यक्रम सञ्चालन गर्दै जाने बताइन्।
रक्तदान कार्यक्रममा ३५ जनाले रक्तदान गरेका छन्, जसमा १८ जना महिला र १७ जना पुरुष रहेका छन्। आयोजकका अनुसार उत्साहजनक सहभागितासहित सम्पन्न कार्यक्रमले रक्तदानप्रति समुदायमा सकारात्मक सन्देश प्रवाह गरेको छ। कार्यक्रमको सञ्चालन शिक्षक केदार चौधरीले गरेका थिए।
